Haarle15.jouwweb.nl

Vremd volk achter thuus

Zoo… det is brutaal. Twee vremde vogels bint zo ma bie oons achter in de tuin. Zie kiekt um zig hen en dan kek ut wiefie deur de openstoande deure van ut kleine oale huusie na binnen toe.

Ut mannegie blef op de uutkiek, as ut wiefie em laater ok nog is na binnen hen giet.

Ik besluute nog em te wachen, want ting die twee is toch muulik op te boksen. Met niks kump ut wiefie weer deur de deure na buut’n toe. Lange duurt ut nie veurdat ze ineens vot bint.

 

De voln’de dag bint ze der a weer. Ut huusroad wut na binnen e’slept. Ie wult niet wetten wat doar allemoal na binnen wut e’brach.

Zo wut det tuinhuusie ineens onverkloarbaar bewoont. Ut wiefie blef thuus um ut huusie veur mekaare te maaken. Ut mannegie is hard ant wark. As al det holt nog meubels mut wun, dan zol alle bouwbedriem in Hoarle tesaam der jaloers op wun. 

Ok de catering muj nie uutvlakken. Wat veur etten doar de laatste wekken na binnen wut e’brach. Den wiefie kump straks noojt meer deur die deure hen. Ma zol den de nog weh in zitten.

Meskien is’ter weh wat gebeurt, datte ut heel muulik hef. Dat ut mannegie deurumme zovölle etten doar hen brengt.

Better un goeje buur dan un verre vriend, zeg ze dan tog. Dus trek ik miene stoute skoene an en goa na buuten toe. Meteene giet er un allarm of. Den mannegie fluit schel un ofgesprökken kode en probeert mie of te leiden. Det loat ik mie zo nie gebeuren, dus loope na ut huusie toe. Ut gefluit wut arger en dut hoaste zeer an miene oorn.

Ak deur de open deure na binnen wil loern, dan zie ik niks, ma binnen heur ik weh gepiep. Dus ut wiefie hef visite. Hep aans gin vremd volk doar na binnen zien goane. Vremd, heel vremd.

Ut mannegie blef zenuwachtig doene, dus goa ik terugge na binnen in oons eigen huus.

 

De volgende dag wut der rommel na buuten e’gooit. Det kan der ok nog weh bie. Ik stappe der nog nie direct op of, want ut mannegie fluit noe op un aandere toon. En kiek…

Jonge koolmeesies komt veur ut eerst na buuten toe en kriegt de eerste vlieglesse.

Dat ik doar getuuge van mag wenne.

 

©2017 Piet Plezier.


Reactie plaatsen

Reacties

Martin Wichink
4 jaar geleden

Maar zo brutaal als de neten... hi hi.

Anne-Marie Hoogendijk
4 jaar geleden

mooi verhaald

Rating: 2 sterren
1 stem

Klik hier om naar boven te gaan.

Maak een Gratis Website met JouwWeb