De ofgelopen wekken zul ie ut ok weh weer e’rökken hem. De boer’n bint weer ant gieren e’wes.

Hier en doar heur ie dan ok weer klaag’n oaver stank oaverlast. Terwijl dit a van oldsher wut e’doane. Ie mut ut laand bemest’n um de gewassen te loaten gruujn. Verder verget de mensen, dat ze zelf noe spuitbussen vol geemieze rommel in’troone, spuit veur wat frisse geur op de wc of in huus.

Wet nog goed dat wie vrögger gin riool han. De wc was un holt’n kiste met doarop un plaanke met un gat der in. Weh lag doar un deksel op teegn de stank.

Alles leup an de onderkaante via un grisbuize, zo de beerputte in. De oaverloop hier van leup weer deur in de (stront)sloot.

Elk noajoar wun de beerputte löss e’maakt en leug e’schept.

Liters vol stront, zeik en kraant’npapier wun op ut laand e’brach, veur dat dit umme spit wun. Riege veur riege wun dit twee spit diepe, in enkele wekken e’doane en dit was haandwark.

Int veurjoar wun ok nog is koemest van de buurman uut de gruppe, opt laand e’brach.

Noe was één spit diepe genoch. Zo in april of mei wun de zoaden e’zei’jt veur eigen gruunte en jappel.

Soms kon ie met’maak’n, dat aj wottels uut de grond wöln trekken, dat doar nog un stukkie kraante an vaste zat. Aj héél völle geluk han, stunt doar nog de doatum op, wanneer ie veur ut laast noa de pot waane e’wes. Ok han de gruunte soms allerlei vorm’n, diej noe nie meer in de winkel ziet.

Ok möss ie met deur ut jappellaand hen, um kalloraadekevers te vang’n.

As beloning moggen wie die verbraan met petrolium, umdat ze schadelik zoln wenne.

Swinters stunt der genog water in de strontsloot, woar ok nog weh is un spoorn in bleef driem. As de sloot bevreurn was en goed was bevunn’n um op te goan schaatsen, han wie nooit gin gebrek an streepies of andere herkenningspunten. Passeern ging muulik en soms viel der weh is eene.

Met un broene streep op de olde bokse koj nog rustig wieder schaatsen.

Zo ziej ma weer. Stront is van alle tieden en heurt bie oons in ut riesajkelproses. Noe de volkstuinties steeds minder wut, zörgt de laand en tuinbouw veur oons etten op ut bord. Denk doar ok ma is oaver noa.

©2017 Piet Plezier.

Klik hier om naar boven te gaan.