Aj niks probeert.

Mangs pruts ie weh is wat en det doet wie allemoal weh is. A is ut gewoon um iets nie’js uut probeeren of ut warkt, wat ie in de kop hebt zitten. Nie’je idee’jen hoeft nog nie aaltied a vorm te hem, mangs muj doar nog wat an bieschaam. Dus nutteloos is ut nie, ok a gooj ie ut laater an de kaante, omdat ut oe nie helemoal an stiet.

Misschien mut ie weh eerst noadenken over een aandere oplossing of ie bedenkt helemoal iets nie’js. Det mag ie allemoal hiemoa in oe eentje uut prakkezeeren. Wat der in oene kop ummegiet, doar kan niemand bie kommen.

Un aander zal misschien zeng daj ant dagdreumen bint, terwijl ie keihard an un oplossing ant bedenken bint. Tis soms ongeliek verdeeld in de wereld. Ma ie mut ma zo rekken, un aandere keer kan ut ok aanssumme wenne.

Mangs muj doaroaver iets opzuuken of ie goat na un winkel toe um inspiraatsie te kriegen. Un aander giet muziek luusteren of kek televiesie zonder wat te ziene. As ut eenmoal in oene kop maalt, dan probeer det ma is te stoppen. De lukt hoaste nie.

Ma o wee, as ut oe uuteindelik weh giet lukken, dan bin ie zelf a helemoal blie’j. Loat stoane daj der un aander ok met blie’j kunt maaken of heffe maakt. Aj dan goed noa goat, dan mag ie oezelf un uutvinder nuumen. Nie zo groot, dat ut de hele wereld oaver giet, ma weh in oene eigen umgeving. Det wul nie zeggen dat ut via soosiejaale media verder kan kommen, ma doar is ut oe nie um te doene.

Nee gewoon ut jess gevuul dat ut oe lukt is, wat ie in oene kop han zitten. Det gevuul is gewoon nie met un penne te beschrieven.

Misschien is ut oe gewoon e’lukt met un stukkie ofval, dan bin ie gelieke ok nog is ant riesajkelen. As det zo is, dan bin ie helemoal goed bezig. Ok a is de tied daj hier met bezig bint niet betaald deur iemand en dat kan oe ok nog is niks schellen, ut moment dat ut oe weh e’lukt is, det is en blef onbetaalbaar en zet oe an um nie’je dingen te goan probeeren. A is ut alleene a um det gevuul nog is met te maaken. Aj niks probeert, kom ie noojt wieder.

©2024 Piet Plezier.