Dopneuze.
Wie kriegt allemoal de genen van oonze olders met en uut ut geslacht doorveur. Doar is niks mis met, want doar kun ie de familie vaake weh an herkennen. Det is gieneetties vaake gemanniepuleerd anweezig in oonze cellen. Tjonge jonge, wat un paar muulike woorden bint det tog.
Noe kuj zeggen van ‘Nou en’, ma ie kunt ok zeggen van ‘Woar giet dit noe eigenlik oaver’. Um ut leste giet het meer eigenlik. Ik wol oe met nemmen noar de nie’je wetgeving. Want dit joar is ut per een juli tweeduuzendveerentwintig verplicht um de plastic dop op de plastic flesse vast te maaken deur de fabriekkanten.
Veur de natuur zal het un hele hoop schellen dat der noe gin of minder plastic doarin terechtte kump. Ut is gewoon un kwestie van oene eigen spullen met nemmen of opruumen. Ofval gooi ie thuus toch ok in de prullebak, dus onderweg kom ie der vaake zat eene teegn. Ma um bie ut leuge flessie te blieven, den kuj dan ok met dop inleaveren veur staatsiegeld bie de winkel.
Nie’je flessen open ie vaake tutdat ie ut sissen heurt van ut koolzuurgas. Ie kunt dan de flesse weh wieder löss drei’jen, ma dan blef de dop an un dun lippie hangen. Um ut drinken gemakkelik te maaken, drinkt ut gemakkeliks met de dop op de neuze. Veur un paar keer zal det niet zovölle uut maaken, ma ik bin bange veur de lange termijn viesie. Eigenlik dat der meer luu straks op mekaare goat lieken. Kiek zeg ie dan, den hef ok dezelfde dopneuze as mien breur of zuster. Det kuj ziene an de groeven van de drei’jdop op ziene neuze. Ut enigste woar ik zeker op hoppe, is dat de kleur van de dop nie ofgef, want dan zol ie an de kleur ok nog kun ziene wat iemand graag drinkt.
In ut ziekenhuus zol dit weh makkelikker kunnen wenne. Em un neusannelieze en ie wet watte vaake drinkt.
Ma zol ut niet gewoon wat better wenne, dat wie met zien allen minder plastik goat gebruuken. Det is better veur ut mil’jeu en veur oons zelf ok. Zodat plastik nie meer in oons bloed en cellen veur kump. Wie roest zo nog nie vot, dat wie zelf det plastik neudig hebt. Gewoon un bettie oonze verstaand bliem gebruuken.
©2024 Piet Plezier.
