Bloemen hoalt van luu en aansumme ok.

Wie as luu op disse aardbol bint noe eenmoal gek van de natuur. Det kan ok nie aans, want wie hebt der elke dag met te maaken. Zo geniet wie van alles wat gruu’jt en bluu’jt. Ut beste kuj det ziene int veurjoar. Geraamtes van de beume kriegt weer kleur en de eerste bluumkes komt uut de grond of wut as bloezem van un stroek of boom herkent. Mangs bint ze ok te herkennen an hun geur.

Winkeliers hebt doar heel handig op inne’spoalt. Zie hebt doar ok un handige reclame veur e’maakt. Bloemen hoalt van mensen. Wus ie dat deur disse reklame in ut eerste joar de umzet met dattig procent is e’steegn.

Kweekers woln hiermet niet achtbliem, dus kreeg de paus de mooiste bloemen met Poasen op ut Sint Pietersplein bie de Pauselijke zeegn. Eerst ut Urbi et Orbi en dan…. “Holland, bedankt voor die bloemen.” Twee starke wapens in de bloemenindustrie.

Ut is aaltied heel attent as der un bluumegie kloarstiet bie un ofscheid van eene uut ut bestuur of iemand die heel lange wat veur de vereniging heffe doane. Natuurlijk kan der ok eene ziek wenne of op det moment muulik hef noa un zwoare periode, dan kuj met un bluumke iemand em un hart onder de riem stekken.

Natuurlik bint der ook luu, die vaake veur un aander kloar stoat en door niks veur wult hem, dan is un bluumke toch net iets aans, dan daj ze gewoon geld of un flesse drank in de haane drukt.

Weer andere luu wilt gewoon elke wiekend un bluumke op toafel hem stoane. Uut eigen tuin of un gekocht bossie bloemen bie ut boodschappen doene. As un duudelijke scheidingslijn tussen warken en bie huus wenne.

Zelf stoat wie weh is veur un aander kloar, ma wie bint ok attent met un kaartje bie geboorte, verjoardag of bie un aandere geleegnheid. Kleine muu’jte ma met een groote waardering en doar doe’j ut veur. Af en toe krieg ie ut ok weh eens terugge. Ma met disse pinksterweekend ging ut net em aans. Vrie’jdag ging ineens de deurbelle. Kreeg un hangplante in de haane e’drukt. Alleene umdat ik van disse stukkies skrief. Wasse totaal oaverdonderd. Bedankt de opdrachtgever ma em zo. Heb de plante oppehang en kan der met dit mooie weer extra van genieten.

©2020 Piet Plezier.