Bermbraand

is ut un peuk

of un stukkie glas

misskien weh un leug blikkie fris

kan ok wenne dat de zunne stark aanwezig was

bint ut misskien weh jonge knapen

die dan ineens vandaalen wut e’nuumd

as ze rommel van un aander verbraand

en vindt dat ze ut zo zelf hebt opperuumd

gin paus is der te bekennen

as witte rook dan trekt oaver de weg

polietsie en braandweer komt der’an

umdat een umwonende dit deur de telefoon hef e’zeg

de weg wut offe’zet

en slangen vult zich vol water

noa elf van disse brandjes in eene stroate

zit de gemeenschap noe met een kater

as ut dreuge bos in zien geheel mette’goane was

hat ut heel aans kunnen afloopen

maak gin vuur en ruum oen eigen rotzooi op

is misskien weh de les wat wie in oonze oren mut knoopen

©2022 Piet Plezier