Aanderhalve meter.

Bin ie ok zo toe an vakaansie? Nou ikke weh. Net noe alles weer löss is e’loaten int veurjoar, kump noe de eerste waarschuwingen a weer binnen. Der zol un nieuwe golf van Corona ankommen.

Net noe Hoarle weer op de internatsionaale kaarte kump te stoane. Völle vekaansiegangers weet ut vekaansiepark, vekaansiehuuze en de mini campings weer te vinden, die Hoarle rieke is. Vandoor dat ik ma bin begunnen met waarschuwen op de vaste borden. Hoal anderhalve meter ofstand, proest in oene elleboog. Aj lange genog wacht, dreugt det met ut warme weer vanzelf weh weer op.

Dat Hoarle internatsionaaler wut blek weh dat der noe ok a borden wut e’maakt voor luu uut de Aziaatiese wereld. Doar least ze van rechts noar links of van onder noar boaven. Kiek der nie van op dat disse borden grooter bint, want probeer zelf zo ma is te skriem, det valt nog nie met.

Dan muj ok nog in 8TING nemmen, daj AANSUMME, ok aansumme skrieft van rechts noar links of van onderkaante noar boaven toe. Gelukkig kuj veur de neudige ekstraa inlichtingen terechte op een spesieaale website, alleen veur Hoarle. Wacht, zal ut em opskriem veur jullie.

Wee Wee Wee, punt, anderhalvemeterinHoarle, punt, NL.

Hierbie zal un foto stoan en doar stiet dan ok nog op van ‘Klïk hier.

Zoaj messchien a ziet, heb de ï van klïk twee punties. Det is bewust e’doane, want ut bord mut met twee echte Hoarlese droadnagels vaste wunn e’maakt. Vandoar.

Ma kiek der nie raar van op, dat luu met un Belgies kenteken bie ut bord stopt en op de spieker drukt, um zo de website te openen. Kan oe noe a weh verklappen dat dit noojt giet lukken, mog ie ut zelf nog is wiln probeern.

 Ma alle gekheid op un stökkie, ik hoppe dat ut disse zommer allemoal goed mag goane. Wie hebt ut zelf ok allemoal un bettie in eigen haand. Kiek un bettie uut en hoalt ok rekkenschap met un aander, dan hebt wie uuteindelijk der allemoal wat an.

Fijne vekaansie allemoal en geniet der van, ma kom gezond weer terugge.

©2022 Piet Plezier.