Wus ie a dat al dattig joar Hoarle en Albergen een uutwisseling hebt met Sinterkloaspakkies maaken veur olderen met mekaare.
Dat achter de scharmen doar völle vrie-jwilligers met bezig bint. Vrogger gebeurn det allemaol met de haand. Naam’n uutzuuken, liesten maaken, streukies skriem en dan ok allemoal vot breng, noadat ze ok nog langs de deure waan e’wes of der luu waan, die dan een pakkie woln maaken veur un older iemand of veur eene met un lichaamelike beperking. Daagen waan ze doa druk met.
Die streukies waan ze vaake gelukkig weh in un mum van tied a kwiet. Meteene wun der ok geld oppehaald veur nog meer pakkies, want veur de uutwisseling met Albergen han ze 45 naamen, terwijl er ruum vieftig pakkies maakt mössen wun.
Teegnwoordig giet ut iets makkelukker. Alles giet digitaal. Naamen van veurig joar kunt dit joar ok weer gebruikt wun, tenzij ie deur umstandigheden niet meer op de lieste veur komt. Liesten, streukies, alles is digitaal innevult. Noe hoeft ze alleene ma utteprint en e’sneene wun en doarnoa uutedeelt wun onder de vrie-jwilligers.
Un projectvrie-jwilliger hef oaver ut hele joar de lieste annepast en bie e’hoaln.
Det mut ok weh, want teegnwoordig warkt de vrouwluu ok oaverdag in disse moderne moatskappij. Woar vrogger huusvrouwen un paar middaagn bie mekaare gingen zitten, doar mut ut noe in un spoaraaties vrie-jetied allemoal gebeuren en det doet ze nog aaltied met alle liefde heur.
Vandoar dat ze teegnwoordig beroep doet op oe, via ut dorpskraantie.
Vaake wet de mensen nie hoevölle zogenaamde stille vrie-jwilligers achter de kaante ant wark bint veur aanderen.
Deurumme is ut dat ik hier oaver noe skrieve en hun ok is in ut zunnegie wil zetten. Det heb ze zeker weh verdiend.
Dus aj nog un bettie vrie-je tied oaver hebt en ie wult un pakkie maaken veur un aander veur un hennig bedrag, dan kuj oe opgeem. Of aj det niet wult un klein bedrag oaver maaken noa de Zonnebloem in Hoarle, um vrie-jwilligers de kaans te geem um un pakkie te maaken veur un aander. In Hoarle stoat wie tog aaltied veur mekaare kloar. Dus de vroage, doe ie noe ok met?
Reactie plaatsen
Reacties