Eigenheimers van Hoarle.

Wat un tumult was der bie de presentaatsie van de eerste Hoarlese almanak. Net veur ik an de beurte was, wun der vertelt dat Martin Wichink en Piet Plezier aans in de verte familie waan in de skrieverswereld. Sommigen wussen dit al, aanderen han zig det a vaaker of e’vroag’n wie ik toch eigenlik tog wasse. Noe kan ik oe weh vertellen dat wie beide er gin muuj’te met hebt, want wie schrieft löss van mekaar a acht joar met plezier veur ut dorpskraantie. Eerst op papier, ma noe ok digitaal. Dus disse ophef hieroaver, is dan ok helemoal nie neudig.

Tussen alle skrievers en verhalenvertellers in, vuuln ik mie weh thuus. Allemoal kwam zie wat vertel’n oaver hun leavensverhaal of passie in de eerste Hoarlese almanak.

Kiek aj dan tog ophef wil hem, dan haj doar weh goed mun luusteren. Dan was oe net als ik weh oppeval’n, dat iedereene deur Robert Kemper was benaderd of e’vroag’n um met te warken an dit boek. Wat mut die man dan un garismaa hem, dat ze allemoal joa heb e’zeg. Noe kan ik doar un grappie oaver maken, datte bie zien eigen bruiloft ok gin nee wulde heur’n, ma det goa ik eg nie doene.

Veur ut boek hoemde Robert helemoal niet zo verre vot. Een buurman scheuf um em hondervieftig joar post deur de briembusse hen. De oaverbuurman hef der zien hele tuin veur op de kop e’zet. Aj det allemoal kunt, dan bin ie weh wat maans.

Kiek un dreum hem is aaltied nog wat aans dan de dreum uutvoer’n, ok a is de geschiedenis oaver Hoarle zelf oene passie. Deurumme verbaast ut mie ok nie, dat de veer kjals, die de stichting De Marcke hebt oppericht zo’n veertig joar geleden, as eerste ut buukie kreegn annereikt. Ma Illegaal of nie, zie waan a weh zo’n tien joar a ant verzamelen e’wes en un bettere start kuj dan as stichting dan ok nie kriegn.

Dan kunt wie noe bes weh sprekken oaver een echte eigenheimer op Hoarlese grond. As ut boek as potjappel e’pot is en uutegruuj’t tut un volwassen jappelplante met alle skrievers en vertellers doorbie en deur de wottels bint verbunden.

Het is dan ok un prachtig boek e’wun en det zol ie as un echte Hoarlese droadnagel allemoal in de kaste mun hem stoane en leaz’n. Kan ut oe eg weh anroane.

Bin ie der noe nie e’wes op den bewuste oamd, dan kuj nog altied ut boek goan besteln.

Wacht ik zal oe hieronder un link der bie skriem, dan hoef ie doar alleene ma op te klikken en ut boek te goan bestel’n.

Hoarlese almanak

Nie dat ik zelf hier better van wut en doar giet ut mie ok nie umme, ma ut giet weh weer um een stukkie geschiedenis oaver Hoarle en doar maak ik ok miene momenten met en skrieve doarover, net as alle aanderen uut ut dit buukie. Ut moo’je van alles is weh, dat de Hoarlese samenwarking ok hier weer tut bluu’j is e’kom. Ok mooj is um te ziene, dat hoeverre daj ok weg woont, de wottels met Hoarle noojt wut verbrökken. De stichting hef zig weer mooj in de skienwarpers e’zet. Veural zo deurgoane en ut volgende deel kan dan ok veur de dag kommen.

©2024 Piet Plezier