Bos.

Mangs denk ie weh is oaver woorden noa. Nem noe gewoon ut woordje bos. Iedereen kent natuurlijk weh ut sprekwoord, deur de beume ut bos nie meer ziene. Dus ut bos bestied uut meerdere beume, loat det noe direct al duudelik wenne.

Vaake deur grondgebrek bint der natuurlijk meerdere belangen bie betrökken en deurumme viel mie ut woordje ok zo op. Zal is probeeren um un bettie duudelijkheid te verschaffen.

Ut woordje bos bestied uut dree letters. De B, de O en de S. As noe de O de beume veursteld, blieft de B en de S oaver.

De B kan stoane veur burgers, boeren, die der gebruuk van maakt.

De S stied dan veur Staatbosbeheer, die ut onderhoald mut pleegen. Zie bepaald uuteindelik hoe ut der uut kump te ziene. Det doet ze regelmoatig met groot matreriaal en doar hoef ie gin speurneuze van de oerr kidsvereniging te wenne. Met oen eigen blote oog kieken is vaake a genog. Ie hoeft der alleene ma op uut te trekken.

Staatsbosbeheer mut dan ok samenwarken met de burgers, boeren en de brandweer. Ie wult toch nie graag dat ut bos in de fik giet, dus bint doar ok plannen veur e’maakt. Braandgangen veur un snelle roete en um ut vuur un halt toe te roepen. De boeren zorgt der veur met hun giertanks veur water. Burgers kunt dan helpen met hun schuppen zaand der op gooien of beginnende vlammen te dooven. Zo hoal ie de schade beperkt.

Zolange aj ma met mekaare blieft proaten, giet ut in ut algemeen weh goed. Aans wut ut, as bepaalde luu ineens ut recht wult hem um huuze te bouwen, parkeergeleengheden an te leggen of dat ut bestemmingsplan ineens wut e’wijzigd. Dan kunt der groepen ontstoane, due pal veur hun belang goat stoan, umdat hun eigen woonplekke int geding kump. Wie hoald noe eenmoal van rust, ma wie stoat ok open veur veranderingen noa un demokraaties besluut. Dus wilde plannen goat der bie oons zo niet in.

Em un stukkie wandelen veurdat ie wat zegt of doet, det zoln soms wat meer luu mun doene. Zeker aj deur de beume ut bos niet meer ziet.

Ik zie oe vaste nog weh un keer loopen, oj noe un burger, boer bint of luu van de brandweer en Staatsbosbeheer. Ut bos is van oons allemoal.

©2021 Piet Plezier


Reactie plaatsen

Reacties

Er zijn geen reacties geplaatst.

Klik hier um noa boam te goane.