Kuut'nbieters

Veur de viefde keer a’weer wun vandaage de Hoarlerbargloop organiseert. Ut eerste lustrum en alle vief keer was ik der ok bie. Zie hept mie e’vroagt of ik met wolle doene. Wie kon genog EHBO-ers krieg, dus wol ik weh vrie-jwilliger wenne. Em un keer wat aans. Tut mien verbaazing kreeg ik ut mooj-ste plekkie vant parkoer. Boam op de Koningsbult’n.

 

Ma eers zak is un bettie verteln oaver de loop zelf. Wie begint met de een kilometer. Det is veur de jeugd. Ut bint kleine wichter oet oons dorp of wichter van de loopers die met doet. Zie wut goed annemoedigd deur de olders en kiekers. Zie bint dan ok zo weer un medajje rieker.

 

De twee kilometer is de kweekviever veur de vief kilometer. Twee keer loop ze dan ok het runtie van de een kilometer. Noa een runtie weet ze dan ok weh de weg. De meeste loopers zie-j dan ok vaker weh weer, veural asse weh is e’wun e’hept.

 

De vief kilometer hept ut zwoarste van allemoal. Det kank boam op de Koningsbulten mooj ziene. Det kump daj zo völle verskillende loopers hept. As de fietsers die veurop ried, bienoa annedrukt wut deur de echte hadloopers, dan goat die nog nie hard genog. Terwijl ze tut noe toe het muulekste stuk hept e’hat. Want van of  de skoapskooj klim ie geleideluk steeds wieder na boam toe. Ut laaste stukie giet ut nog em steil, woar dan ok völle mensen op stuk loopt.

As dan de echte hadloopers veurbie bint, dan komt der nog un paar die regelmoatig hard loopt. Zie hept un rood neusie en toch loopt ze fanatiek deur. Dan komt de amateurs langs. Dikke rooje köppe en een flink gehijg. Ma zie goat deur. Dan kriej nog de snel wandelaars en strompelaars, die blie-j bint dat ze bie mie boam op de barg binte kom. Ik kriege de strompelaars dan ok aaltied weer ant hardloopen, veural as ze van mie heurt, dat ze ut hoogste punt hept bereikt en weer na beneden goat.

 

Kan mie det weh heel goed veursteln, want vrogger hek det zelf ok weh isse loopen, toen de pakeerplaase nog an de bargweg was. Ut klimwark is heel subtiel anneleg. Ie slingert deur ut bos deur oaver un smal paagie. 

Steeds verder klim ie dan ok omhoog. Ut laatste stukkie is dan ok echt un kuutenbieter en aj det haalt wacht oe de belooning. Boam op de top kiek ie gelieke op ut heideveld.

   

As dan ok nog de zunne net boam oaver de barg hen kump, dan liekt ut net oj de wiede wereld in loopt.

 

Ma ik dwaale bienoa of oaver dit mooje plekkie. De loopers mut dan rechtsof en noa un kleine honderd meter goat ze weer terugge na Hoarle, woar ze bie de fieniesh un warm onthaal wacht.

 ScreenShot036.jpg

De tien kilometer mut natuurluk iets wieder loopen. Net as de viefe komt ze bie mie an. Ok hier hej hadloopers en… skaatsers. Zagge in un flits Erben Wennemars ok veurbie kommen. Misskien kumpe dan ok weh skaatsen op de iesbaane an de Roalterdiek. Ma um bie ut verhaal te bliem, as ze bie mie weg loopt, dan stekt ze de bargweg oaver. Det is van oarsprong un broedgebied veur de vogels. Dat de gaanzen oaver trekt, zal weh toeval wenne.

Veur de wandelaars kan ut weh em skrikken wenne, want zo völle vremde voogels hei-j normaal doar normaal noojt. Hier hept de Hoarlese loopers un stark veurdeel. As ze teminste vroager goed hept oppelet. Zie hept doar vast weh met hun olders doar weh isse loopen bie de Paltetooren en ut heksenhuusie. Langs de paagies van de roodoodendrons komt zie dan ok weer bie ut bekende kruuspunt int bos uut, woar ie na Holten, Riessen en Nijverdal kunt. De loopers goat richting Hoarle. Nog kriegt ze un stukkie bos, um de bie-jen nie te verstoorn. Ok dan wut ze van de Enk offe proat tut an de fieniesh. Doar wacht ze dan ok een lekkere hap of un bak koffie.

Ondertussen wut alle prut weer verzaameld veur volgend joar. Dan hop ik ok weer op ut mooj-ste plekkie te meug stoane.  

© 2014 Martin Wichink


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier om naar boven te gaan.

Maak jouw eigen website met JouwWeb