Un trugblik van...

Ik beginne biet begin, dus bie de jeugt. (deel ééne)

Op de lèègere skoele in de éérste klasse ist begun. Meester Weijkamp vreug geliek an de jongs, oj weh éénse dag han um te goan voetball’n. Veur un ander woj’ut nie weten, dus ging ie der bie.

Kleere en skoene koj haaln bie Gaitie vant Erve in de wèènkel. Kreej gin korting, dan kreej weh un penne of snùùpies.

A snel haj un elftal veur de EFfies bie mekaare. Met zien allen loop’n wie al snel op’n kloet’n. Meester Weijkamp hat dan ok een joar de tied um oons uut mekaare te kriegn.

 

Noa det joar kwam ut eerste klapstuk. De vereeneging bestunt viemtwintig joar. Alle jeugdtiems môggen toen tingt èèrste voetball’n. Wie hebt toen nog met vèèr-drèèje wúnn en det hek nie e’dreumt.

Ok bint wie met òònse leiders noar Go Ahet e’wes. Ut gaf niks daw doar mössen stoan. Noe kon wie better lóage flessies zùùk’n veur wat statiegeld. Wie wissen veur ut thuusfròònd weh, dat Ajax doar kwaamp voetball’n. De uutslag bink vergetten deur alle hektiek.

 

Doarnoar bin’k over’e goane noa de Eeetjes. Trèèn deew opt laant van Roettering.

Doar kwam mien tallent as verdeedeger na veuren. Alleen as kieper, doar waak nie eg geschikt veur.

Buuten de teeng gools umme, hef mie det ok nog un gekneusde pols oppelévert. Moar doar bik noe weh weer van geneez’n.

 

Bie de Deetjes ging wie veurt eerst nát groote veld. Det was mie toch un nènde loop’n van de èène noar’n de andere kàànte. De leiders kon’n ma nie begriep’n, daw soms te mùù wààn’n um terugge te kom’n. Doar muj tog ok èèrs an wén’n.

A ging ut posietsiespel nie himmoa good, tog begreep’n wie weh hoe ut möss.

Van de Ceetjes week nie meer zovölle van. Det is dan waarschijnluk ok gin hoogtepunt e’wes.

 

Van de Beetjes week nog, dak un keer bie A èène mösse invall’n. Det was má van korte duur. Was net kòlt ut veld innegoane met wissel’n en hat nog gin bal annerààkt. Opt moment dak veur de èèrsen balle ginge, krèèk un schup van tèèngstander op de bùùtenkàànte van mien enkel. Det dèèt zo gloepens zeer, dak mie gin moment bedagge. Ik dreajn mie úmme en hààln zonder noa te denk’n ùùt. Toen bink ut veld al weer ùùte stuurt. De scheits hat ut volgens mie nie himmoa goed e’zèène.

 

Doarna ging wie noar A twèè toe. Noa un belabbet joar kon wie nie verder zakk’n. Gelukkug haw nog weh un voetbaltoernooj in Hoarle. Wie mössen ting de Hoarlese kampioen A èène. Ut ging bes weh zwoar, mar tog heuln wie stànt.

Toen Hans van Knobb’n Harm de balle ùùt schòòt, kónne nie begriepen dat Gaitie Tijs um in een keer op de sloffe kon ném. Un fraaie boogballe kreege dan ok direkt terugge. Over ziene haane hen en onder de latte deur.

Ut was weh bááln veur A èène, want wie ging der met de beker vandeur.

 

Int vólnde deel vertel ik miene gebeurteniss’n, hoe’t was bie de groot’n.

Dan kom’mie bie de groot’n voetball’n. (deel twéé).

Int veurige deel hek ut hat oaver miene gebeurteniss’n bie de jeugt.

Umdat de seleksie nog nie bekent is veur iederèène, kriej kààns umis wat hooger te goan voetball’n.

Twee wedstried’n môg ik met doen int vèèrde. Det was dan ok geliek mien hoogtepunt op det nievoo, doarnoa bik nog nooit weer zo hooge kúm.

Int viefde kwaam’ik toen tregte. Doarna bik alleen ma iets vedder e’zakt.

 

Wie ging ok weh ééns op de fietse noa Nijverdal toe um te voetball’n. Dan waan wie al mùù, veur daw begún wààn en det köss’n òòns hoogùùt drèè punt’n. Met bier drink’n wún wie dan weh weer noa de tied.

Ok bin wie un wiekent weg e’wes. Ut was een soort trèèningskààmp. Ik geleuve nie daw doar un wedstriet wún e’hebt of ut was in de derde helfte.

De diskoteek in die plààse was soams gelieke vol, toen wie met de vroale der bie, doar binn’n kwààm.

Veur dat wie de voll’n dag terug noar huus woll’n, ging wie eers nog etten bie de sjienees. Doar hef Henk van keupsie e’leert, dat de loempiaas doar grooter wààn dan bie Gé van de Knobbe. Deurumme hatte der ok mä drie bestelt. Hej hef zig nie loat’n kenn’n en hef alle gruunte oppe’getten. Ak ut verhaal’n mag geleum, maj bliej wén daj nie doarnoa bie in de auto zààt’n.

 

Twee keer bink ok in èèn elftal drèè vénte tèègn e’kom van Hoek Jan, an de Almeloose weg. Det was nie zo apát, want doar han ze bienoa un elftal thuus. Zie han doar zelfs un keeper, Henkie is de nààme. Den kan mie wáskijnlúk nog gòòt herrin’den… dénk ik. In èèn wedstriet met de korners ném, hek twee keer de balle weggekopt oaver de achterliene. De derde keer hek de korner der zelf mar inne kopt, a was ut weh an de vekèèrde kàànte. Weh was de balle onholtbaar veur elke kieper, dus ok veur Henkie.

 

Wie bint ok un keer met Gaitie Tijs met trekker en wààg’n noar Luttenbárg e’wes.

Op de trugweg mössen wie al tenk’n. De trekker dèèt nog weh, mar wie hán döss. Bie de schoenmaaker lén wie an en drunk’n de doar èèrs ok nog un pààr. Toe ging der ok nog un pààr kratt’n bier met op de wààg’n veur onderweg. Wie wààn bliekbaar zón biezundere verschijning, dat ze mùùjte han um òòns in te hààln. Wat der nog oaver was van’t bier toew oaver wààn, môg Gaitie met nêm. Mô det was nie zóó völle meer.

 

Tog hek met hèèl wat grootheden (úút Hoarle en úmstrèèkn) e’spélt. Un paar hek der nog zo inspiereerd, dat ze’t skupt hebt tut ut èèrste. Noe kank ze aamoa wel opnùùm, moar dan hej ut bùùkie zo vol.

Ok hek biezondere leiders met e’mààkt. De een was un vark’nboer en de aander deut wat met gierténks. Tog hek altied respekt e’hat, wat zie allemoal mössen rèègeln. A vun ik ut nie leuk ak een halfe wedstriet an de kàànte mösse stoan. Mâ iederèène kreeg ziene beurte. Net as met ut schoonmààk’n van de kleedkààmes.

 

De leste joaren kreew minder wasse. Spòònsering kwààmp ump de hoek kiek’n. Eers van ut gròòtsen kafèè ùùt Hoarle, doarnoa stun wie der saam geknipt op met zien all’n. De sjienees deet ok nog met.

Wie bint doar met potvertèèrn ok nog un keer e’wes. Kon wie metèène de kleinn bekieken, wán den was net un paar wekke olt. Det hef òòns nog un rúntie oppelévert biet etten. Nie dat òòns det zoo völle ùùte mààk’n, wánt de wiekentveurroad is toch wel oppe’goane. Uut vatsoen bint wie toen má over e’goane op flessies. Zo toon ie een bettie respect veur de sponser… toch? Wie kreg der dan ok achtien man oaver de vloere met kroamsküdd’n op zundagmiddag.

 

Op’n vesierde wààng achter un trekker of auto’s met vlagg’n deur Hoarle hen, det hek nooit met e’mààkt. Det kûmp waarskijnlûk umdak nooit in un kampioenselftal hebbe zett’n. Toch hek weh best völle hoogtepunten met e’mak, woarvan ik der hier un paar van hebbe loat’n zien. Meskien hek hier ààn’den doar weh met inspiereert. Die nödig ik dan ok ùùt um ok eens wat te skriem. Doar kan de jeugt miskien nog wat van e’lèèr’n.

 

Olt voetballer Martin Wichink.

 

©2011 Martin Wichink.


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier om naar boven te gaan.