Ik wet nog goed dat miene olders ma un paar fotoos han van vrögger. Det waan spooratiese kiekies en dan ok nog met de hele familie der bie op.
Det was toen un heele duure aangeleegnheid. Zelf mössen wie ut doene met un paar fotoalbums.
Vanaf de geboorte, kleuterskoele, basisskoele, sport tut daj ut huus ut ging. Doarnoa möss ie ut zelf ma uutzuuken. Ie han toe verskillende soorten rollegies wet ik nog.
Van twaalf, veerntwintig of zessendattig fotoos. Den laatsen wun vaake alleen gebruukt bie un groot feest, zoas met de eerste communie. Dan möss ie weh op de foto met opa en oma, va en moe, peetoom en peettante, ut hele gezin en dan nog ene met alle luu der bie op. Aj geluk han, dan hat ie un moderne camera, zodat de eigen fotograaf der ok bie op kwam.
Doar hat ie ma tien seconden veur. Aans möss ie noodgedwungen twee foto’s maaken met twee fotograafen. Aj ze dan eindelijk kon ontwikkelen, umdat ut rollegie eindelijk vol was noa zovölle wekke of moanden, dan duurn det ok nog is eene hele wekke. Dan keek ie gelieke bie de fotograaf of ut eg oene fotoos waan. Slechte fotoos of die beweugn waan, haaln ie de gelieke uut um ze achteran in ut mappie te doene. Betaalen möss ie weh, want ok die waan offedrukt en de foutjes han zie nie e’maakt.
Teegnwoordig giet ut weh un bettie aans. Cameraas wut hoaste nie meer gebruukt, umdat ze met mobielties ok goeje fotoos kunt maakn.
Diegitaal hef ut allemoal weh makkelukker e’maakt. Ie kun gelieke kieken of de foto goed is e’maakt en aans wis ie um gelieke weer. Dan kuj um aaltied weer opnie-j maakn of ie skiet der gelieke meer achter mekaare en zuukt dan de moojsen uut. Oaveral wut teegnwoordig fotoos van e’maakt. Ie kunt ze ok zo makkeluk op un stikkie zetten of op oene compjoeter. Em un mappie anmaakn met doatum en gebeurtenis en alle fotoos van den dag der in zetten. Zo hoef ie laater de wichters alleene ma un stikkie met te geem. Alles keurig in mappies van de geboorte tut dat ze ut huus uut goat. Zo krie-eer ie wichter van vieftienduuzend fotoos, waor ze aaltied niet um e’vroagn hebt.
Reactie plaatsen
Reacties