Mösse mien hond uutloaten, dus op pad noar ut Hoonetwalet
Noadat de hond kloar was, leupen wie terugge na huus. Keurig oaver de stoep hen. Wie waan bienoa halverwége toen ik um zag. Een Honda rieder. Ut was gin motorrieder. Ut was ok gin formule één koereur of un auto rieder. Tis gin scheuriezer op de weg, ma weh eene op veer wielen. Nee wil oe nie in de warre breng, ma dissent scheurn zo ma oaver ut gröss hen.
Den trök zig niks an van ut volk wat langs leup of reed. Ut wark möss deurgoane. Den kjal wat der achter leup stuurn den grössmei’jer oaver ut gazon.
Baane veur baane zag ie ut gröss kotter wun.
Ut mooje was weh dat den kjal gruun bezig was. Nie van ut gröss, ma hei hat ziene Honda elektries met un lange kaabel.
Asse dan zo goed bezig is, dan denk ik ok weh datte dit apperaat oppewekt hef met gruune stroom. Wat oppewekt is met windmoolens, zunnepaneelen en zo. Noe hek a weh e’zeene datte zunnepaneelen op zien dak van hun huus hef ling, dus isse weh van disse tied.
Ut zol mie dan ok niks verwonderen, datte achter hun huus ok nog un composhoop maakt of hef veur de planten en stroeken in hun tuin.
De stroeken bint prachtig bie e’knipt en kriegt op tied hun mest. Hun tuin ligt der eenmoal mooj bie en det zie de vogels ok, die doar komt nestelen.
Pieren trekt ze doar uut de grond as etten. Un mooje plekke um hun wichters groot te brengen.
Zo, den kjal is a weer kloar veur un wekke. Ut lig der weer strak bie as un voetbalveld zonder lijntjes.
De komposhoop veur ut volgende joar wut a weer un bettie grooter e’maakt. Denke da’k um weh vaaker zal ziene riene.
Reactie plaatsen
Reacties