Heb ie ut nie’je joar al goed inne luud? Nou ikke weh en wens jullie allemoal dan ok ut beste veur ut joar 2020. Ma is kieken wat ut dit joar allemoal zal brengen.
De klokke hef gelieke um middernacht e’sloane, dus wie bint e’waarskuuwd. Alle dree klokken gingen em te keer en kwaamp boam ut vuurwark uut, ma det duurn nie lange.
Normaal heur ie eene klokke sloan veur de tied watte an mut geem. Doarnoast heb ik ok nog un klokke veur as der eene oaverleene is. Dit kan bie un begravenis wenne, ma ok um elf uur s’mons as der eene uut oons dorp is oaverleene. Snel kan ut nie’js in Hoarle dan ok rondgoane.
Op zig ok niks mis met, want det hoald oons betrokken bie de samenleeving.
Ut vroolekst wut ik as alle dree klokken tegelieke luud veur un misse of bie un trouwerie’je of zo. Deurdat ze verskilt van greute, goat ze nie allemoal tegelieke. Of is oe det nog noojt oppevaln. Dan zol ik de volgende keer ma is goed goan luusteren.
Aj goed luusterd, dan heur ie ut tempo van de klokken noar mekaare toe goane en veur een tel bienoa gelieke sloan, um dan weer van mekaare weg te lopen. Em later gebeurt dit nog weh un keer. Det vind ik mooj um te heuren.
Noe hebt un paar droadnagels un oald miesteerie nie’j leam innebloazen, want der is gin pastoor hier, die ut ontkent of bevestigd.
Um un verzunken karke helemoal uut te graam, giet ok mie oarig verre. Dan muj heel Hoarle dreuge leng en det giet nie.
Tog geleuf ik weh dat der un kern van woarheid in zit. As de klokken twaalf uur mut sloane, dan denk ik weh is noa de laatste slag, ik heure un vage slag as laatste. Is det noe un slag of nie. Dan zol det nummer dertien wenne, ma det geleuf ik nie. De klokken bint teengwoordig goed diegietaal offestelt en die maakt gin fouten. Dan denk ik dat det meer un leste groet uut ut moeras is, aans kan ik ut niet verkloaren.
Ma goed dat den geest dan mooj in de flesse zit, dan kuj der in gezelschap nog is oaver proaten.
Reactie plaatsen
Reacties