Ie ziet ze steeds vaaker, un kopie van Manneke Pis uut Brussel bie water ornamenten stoane. Stromend water in de tuin sprekt steeds meer mensen an.

Noe muj natuurlek weh uut kieken veur alg in de spuulbak, aans krieg ie verstoppingen. Det kun ie cheemies weh hennig oplossen en doar hoef ie nie veur na ut ziekhuus hen.

Det is mooj zeg ie… nou joa en nee.

Woar ik muujte met hep is ut wildplassen. Woar ie un bekeuring veur kunt kriegn. Viemzeumtig euro is ut noe geleuf ik.

Denke zelf dat Manneke Pis doar nog noojt un stuuver veur betaald hef, umdatte zelfs geld op leaverd. Al die kopie-jen kun in de tuin ok gewoon hun gang goane. Stoa ie zelf wild te pissen, dan muj uutkieken daj nie betrapt wut. Tis eigenlek te gek veur woorden aj det goed noa goat. Wild doej ut eigenlek a nie, want ie hoald um goed vaste, zodat ie nie oaver  of in oene eigen skoene wilt pissen. Vaake doej det in de vrieje natuur, waor gin diksies bint en alleene as de nood ut hoogst is. Verder wul ie ok nie in de bokse pissen.

Loop ie noe bevoorbeeld is in un stad. Probeer ie dan ma is snachs an te bell’n bie wildvremde luu. Die stuurt oe a snel de polietsie op oen dak, umdaj ma op de belle blieft drukken.

Wus ie dat ie doarveur un bekeuring van honderdveertig euro kunt kriegn veur orde verstoring. Aj dan tog un oaverweaging mut maak’n, dan kuj tog better wild goan pissen… lek mie. Det is in ieder geval un stuk goedkooper.

Ma wat aj op elke hoek un diksie zoln zetten. Det zol denk ik un hoop illegaale muurskilderiejen skeln. Ok plakkaaten kun ie doar mooj opplakken, in plaase met hardboard an de lanteernpoal.

Zo ziej ma weer, oaveral is un oplossing veur te bedenken. As ut der op an kump, kuj oaveral weh oaver iets te zeiken hem.

2017 Piet Plezier.  

Klik hier om naar boven te gaan.