Haarle15.jouwweb.nl

Noorderlich

Vandaage wul ik ut is hem oaver ut Noorderlich. Dan heb ik ut natuurluk nie oaver ut lich van Hoarle Noord. Dan zol ie ut hem oaver een paar stroatlanteerns, verlichting van de huuze en stallen van ut vee hem.

Aj echt ut Noorderlich wult zien, dan kuj doar veur na de Noordpool hen reizen.

Dagenlang bin ie dan onderweg um det verschijnsel te bekieken in ma amper in un paar uur, aj geluk hebt. Ie mut det dan ma wat veur oaver hem.

Nee, dan zit wie in Hoarle un heel stuk better. As ik dan oaver ut Noorderlich heb, dan kiek ik weh richting Hoarle Noord. Eerlijk is eerlijk.

Ak dan smons na ut wark hen fietse en de laatste sterregies in de luch kan ziene, vindt ik det mooj. As de dag giet beginnen, zuj op gegeven moment det nie meer met ut bloote oog kunnen ziene.

Ut Noorderlich wat dan doar veur in de plaatse kump, is veur mie net as de dag begint. Asof de noodverlichting an giet bie de schemer. Boam de Helndoornse barg kump dan un steeds breedere baand met gel/oranje gloed, wat steeds groter wut. Net zo lange tut  de zunne ok oaver de barg kan kommen. Van det Noorderlich kan ik regelmatig genieten en hoef doar dan nie verre veur te reizen. Ut mooje van dit alles is, ut kump ok nog is regelmatig veur int hele joar, dus wie zit dan ok mooj gebakken hier in Hoarle met dit verschijnsel. Mangs lek ut weh gold, waj dan ziet.

Dan denk ik wel is bie mie zelf. Zoln ze in Nijverdal toen de weg kwiet wenne wes en ok dit verschijnsel hem e’zeene, toen ze ut ravijn hebt uutegraam?

Hoe gek kuj eigeluk wenne. Nee ech, aj goed noa goat bint der ma un paar luu, die doar wiezer van e’wun bint. De spoorweegen en de fietsers, die deur ut goldzoekerspad kunt fietsen.

Doar maakt wie uut Hoarle dan ok dankbaar gebruuk van.

Ma noe idwaal ik of. Wak nog wol zeggen is, geniet van dit alles moojs wat graatis is, want ok dan heb ie ut Noorder lich e’zeene.

©2018 Piet Plezier.


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier om naar boven te gaan.

Maak een Gratis Website met JouwWeb