Vemaakeluk is ut weh um te ziene, hoe Nederlaand gelieke in paniek is, as de eerst snee in disse winter valt.
Met muujte kunt ze eene landingsbaane vriej hoaln bie schiphol.
De NS loat gelieke minder treinen riene.
Ut zolt wut riekeluk e’streu’jt woar un plan veur e’maakt is. De heele infraastruktuur is direct in de warre.
Ma an de andere kaante lig ut plan ok kloar, veur as ut is zo wiet is. De stempel koode oranje of rood veur ut weer wut offe geem.
Iedereene wut anneroane um bie huus te bliem. Eigenluk bes weh gek. Der riedt minder bussen en treinen, ma hier goat wie toch a völle met oons eigen auto de weg op en det wet ze ok weh. Ie mut gewoon veurzichtig riene en goed uutkieken.
Aj dan ok nog is voldoende ofstand hoalt, dan heb ie tied genoch um te remmen of bie te stuuren.
Dus hoe muuluk kan ut wenne bie un paar centiemeeter snee.
Kiek as der noe gelieke un halve meter lag of nog meer, dan goa’j der vanzelf weh aans over denken.
Aj dan de deure niet uut hoeft, dan blief ie bie huus.
Dan zal ok iedereene kunnen begriepen daj de deure nie uut kunt. Dan is weh van belang daj genoch etten en drinken in huus hebt veur un paar daagn, want völle langer duurt ut noe meestal nie in Nederland.
De beveurroading bie de winkels zal dan ok net zo muuluk wenne. Doar muj dan ok weer begrip veur op kunnen brengen. Want ok die sjofeurs woagt hun leam um met dit weer de weg op te goane. Zie hebt vaake nogal wat an gewich bie zich en aj doar met in de slip komt, doar wuj nie an denken.
Ut hef ziene veurdeelen ok weh. Noe wut der minder hard e’reene op de weg en ie gebruukt ok gin mobiele telefoon meer tijdens ut riene, umdat ie de beide haane ant stuur mut hoaln um in ut spoor van un aander te bliem.
Wut ut dan gin tied dat wie doar leering uut trekt en int vervolg det aans ok nie meer doet?
Reactie plaatsen
Reacties