Haarle15.jouwweb.nl

Tweelingen

Ik vroage mie weh is of… zol der in de natuur ok tweelingen wenne? Doar denk ik dan an, bie de beume in ut bos.

Mangs hej weh is van die gekke beume. Woar de wottels en de stam oarig um mekaare henne drei’jt bint.

Dan denk ik weh is bie miezelf, zoln det noe ok een of twee ei’jige tweelingen wenne? Of zoln det noe gewoon twee of meerdere beumpies wenne, die dan teegn mekaare annegruu’jt bint.

Ik denke zelf dat ze weh wat met mekaare hebt, aans klikt ut nie zo. Of zol ut gewoon un mannelukke en un vrouwlukke soort wenne, die as un getrouwt echpaar deur ut leam mut, tutdat ze e’roo’jt wut of umme weit. Dan bint ze alleen ma riepe veur de holtkachel liekt mie, want fatsoenlukke plaanken krieg ie doar ok nie meer van.

Ut zaagen zal a muuluk zat wenne, ma met un goeje kettingzaage mut ut weh lukken.

Misskien daj der nog un kunswark uut kunt sleppen, dan verdien ie der nog wat an. Ie hebt van die eigensgedrei’jden, die doar völle geld veur wult betaalen.

Ma ok det mut ze zelf ma wetten.

Denke daj dan weh heel goed mut kieken of alle beesies der uut bint, want ie wult tog gin boktor of aandere gevret in huus hem. Stel oe is veur daj mooj na de televiesie zit te kieken en de baanke onder oen gat dondert met un klap in mekaare. Nou dan bin ie der mooj kloar met. Dan muj oene kasten, drempels en oene deuren ok in de gaaten hoalen, aans valt de gaaten doar vanzelf weh in. Dan kuj ut better in de holtkachel doene, dan heur ie ut weh knisperen, ma dan hej der nog un bettie warmte van. Gedrei’jt holt giet hier ok nog is langer met, umdat ut eenmoal strakker in mekaare is e’dreit. Un bettie warmte soams as ut wat koalder wut, is ok nie vekeerd.

Geniet der in ieder geval weh van, want doar is de natuur ok veur bedoeld… tog!

©2018 Piet Plezier.


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier om naar boven te gaan.