Haarle15.jouwweb.nl

Veer joargetieden

Vivaldi hat ut a vrog deur. De veer joargetieden, watte verwarkt hef in ziene muziek. Ie mut der ok oog veur hem.

Ak zelf richting ut bos loope oaver de Mölnweg noar de pas toe, dan mag ik geerne oaver ut weiland noar de beume kieken. Dan kuj de veer joargetieden heel mooj in ziene.

’s Winters bieveurbeeld, bint de beume kaal. Ma as ut giet vriezen, dan hij der aaltied zo mooj wit loagie der oaverhen zitten. Rijp nuumt ze det. Net of ut bos in bluu’j stiet in de winter. Dan zie’j doar ok völle foto’s op sosiesjaale media stoane.

Int veurjoar zie’j de toppen eers gruun wun, net veurdat de knoppen zich loat zien. De sappen van de boom stroomt dan weer deur de aaderen, zak ma zeng. Dan weet ie dat ut veurjoar der an kump. Noe muj mie nie direkt op un wekke vaste spiekeren, want de natuur loat zich tog nie dwingn.

Tussendeur kunt wie in mei nog genieten van de roodoodendrons die dan in bluu’j stoat. Bie ut heksenhuusie hej dan ok de azaalie’jaas in bluu’j stoane. Een pracht gezicht.

Zommers vink de beume ok mooj, as noa un troopiesche reagnbuuje ut stof weer van de blaaderen is offe’spuult. As dan em laater ok nog is ut zunnegie der oaverhen skient, dan blinkt alles mooj alsof ut net skoone maakt is.

In augustus is dan tied veur de bluu’jende heide op de koningsbelten. Eene peerse gloed waj dan ziet.

In de harfst ist tied um oe kloar te maaken veur de winter. Völle dieren hamstert wat ze kunt veur de wintersloap. Wie mag genieten van de prachtige kleurnpracht. Veural in ut begin zie’j ut gruun zich vermengen met de gekleurde blaaderen. Der verkleurt der steeds meer in de loop der tied. Soms lek ut weh of der gold blinkt. Ma ie kunt oe alleene ma rieke rekken met ut beeld waj ziet.

Zo zie’j ma weer, Vivaldi had hier ok ziene muziek kun skriem. Hoarle is zo gek nog nie. Wie hebt meer in huus dat meenigeen denkt.

Zie der vaste noe weh meer em stoan wachen bie den bosraand. Geniet der van luu, tis en blef un mooj gezichte. Aans zie’k oe vaste nog weh un keer aans loopen. Völle wille.

©2017 Piet Plezier.


Reactie plaatsen

Reacties

Martin Wichink
4 jaar geleden

Eerste klopt, tweede moest mei zijn. Typfoutje,
Vivaldi was maar mooi druk in Haarle... hi hi.

Anne-Marie Hoogendijk
4 jaar geleden

Ak zelf ik richting ik mag hier weg das dubbelop.
Tussendeur kunt wie in met nog genieten van de roodoodendrons die dan in bluu’j stoat. wie in hoort hier denk ik niet tussen, leest wat raar deze zin. leuk verhaal

Rating: 2 sterren
1 stem

Klik hier om naar boven te gaan.

Maak een Gratis Website met JouwWeb