Haarle15.jouwweb.nl

Vorst.

Wat is de natuur tog mooj as ut vrös. Planten, stroeken of eigelijk de blaagies die der nog an zit, kriegt dan un witte raand.

De kleur lek wat doffer deur de vorst, ma ut behöld ziene kleuren weh. As de zunne der ok nog is oaver hen schient, dan glinstert ut ok nog is.

Doar kan ik enorm van genieten in de winter en ik hoppe ie’je ok. Ie kriegt ut immers zo ma gratis en veur niks en ie hoeft der ma weinig veur te doene.

Ma vandaage was der iets wat aans aan de haand. Zatte net an de koffie toen ik na buuten keek. Ut zunnegie scheen lekker en de bevreuren blaagies glinsteren mie tegemoet. Ma toen zag ik wat aans. Ut leken weh twee touwgies die deur de wind hen en weer gingen.

Toen ik better keek, deur het rolgedien omhoog te doene, zag ik dat ut un spinnenweb was. Mooi wit beveuren en ut raadsel was oppelöst.

Dan goa ik wieder denken. Zol zon spinne weh wat te etten hem, want vliegen bint der noe tog nie buuten. Of zolle det doene um warm te blieven. Zeg ma un bettie spinnijdig, opgefokt en actief um ut ma nie kold te kriegen. Dan mut ik toegeem datte oarig ziene beste hef e’doane. Nie alleene veur ut raam, ma ok tussen de stuukies zie ik un paar droaden hangen. Of zol de familie bie mekaare zitten, det zol ok nog kunnen.

Zo kunt ze ut etten, wat ze dan saam e’vangt, eerlek verdeelen. Zo overwintert ze dan weh.

Ut blef in ieder geval un mooj gezichte. Kiek dan ma is noar de plaaties op soosiale media zoas feesboek, twitter, instagram en zo. Doar komt de moojste fotoos veurbie. Ik zol zeggen, kiek der is noa en geniet der van. De natuur is mooj en prachtig. Elke dag is der weh weer wat aans te beleuven. Kiek mar is um oe hen en maak der ma is fotoos van met oene mobiel. Vin ie ut niks, dan kuj ut zo weer verwijderen. Gewoon doen dus, wedden daj steeds meer ziet.

©2018 Piet Plezier.


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier om naar boven te gaan.

Maak een Gratis Website met JouwWeb