Haarle15.jouwweb.nl

Wolken

Ie kunt in de wolken wenne aj verliefd bint of aj un geluksmoment met maakt. Dan is ut net aj op un roze wolk leaft.

Ma ak ut oaver wolken heb, det kan ok aans wenne.

Mangs is der gin wolkie an de luch. Ma as ze der weh bint, dan ziej weh is van die windveern of schoapenwolken.

Een mooj gezichte vind ik det. As der un bettie wind stiet, dan kunt ze snel achter mekaar an jaagn, net asof ze mekaare wult griepen. Zie kunt ok zo makkeluk van gedoante verwisselen. Em ziej ze dan in un herkenbare of vremste vorm.

Muj zelf ma is un keer bekieken. Ut eigen ervaaring wet ik, ut verveelt noojt.

Aans wut ut as ze an un breeje baand snel an kump rollen. Vaake ziej dan ok un donkere luch der achteran kommen. De veurspelt vaake weinig goeds.

Det wul zeggen aj ant ut wandelen of fietsen bint. Ie ziet ut ok nie graag, aj de wasse nog buuten heb hangen. Veur de tuin en akkers bin ie gewoon op zien tied un bettie water neudig. As de wolken dan ok nog is met mekaare ant schoern bint of teegn mekaare botst, dan wul ut nog weh is goane onweern.

Mangs zit der un paar flinke klappers der bie. Gratis vuurwark muj dan ma rekken. Hoppeluk hej der verder gin schaa van.

As ut dan weer lichter wut an ut enne van un buuje, dan ziej soms de zunnestroalen deur de gaaten hen kommen. Asof de zunnen wul zeng, ik binne der weer. Gelukkig ma, want ut kan zo ma un paar groaden schellen aj dan nog buuten bint. Onschuldig liekt dan de wolkjes die doar achteran komt, tutdat die ok weer saam gruujt tut un rengbuuje. Ma det ziet wie dan weh weer. Eers ma em genieten van de frisse geuren, die ie dan vaak roekt noadat ut stof van de blaaderen of isse spuult. Zo ziej ma weer, alles in de natuur hef zien nut.

©2018 Piet Plezier.


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier om naar boven te gaan.

Maak een Gratis Website met JouwWeb