Sloroamd 18 oktober 2014

Wie mössen op eigen geleengheid noa Riessen hen kom bie de uutspanning Swatswald. Door kreeng wie eers un bakkie koffie of thee met un plakkie keek. Ok mössen wulle oons riebewiesnummer op skriem, aans moggen wulle gin buggie riene.

Ma eerst ging wie wat aans doene. Handboogskieten en met de bukse skieten. Met handboogskieten möss ie oaver de piele hen kieken, noadat ie um span han. De punte möss dan op het middelste runtie gericht wenne. Det gin weh oarig. Toen bin ik hiernoa na ut buksskieten e’goane. Noast mie kwam Appie stoane. Appie hef as linkshandige met un boog veur rechtshandige skutters, met ziene laaste piele ut bord ok wetten te raaken. De bukse woar ik met möss skieten, hat un piepie boam op de loop zitten. Ik kieke doar oaver hen en skeut ineens de piele van Appie der weer uut. Wus ik völle daj deur ut piepie op de loop deurhen mössen kieken. Noe zag ik ok weh dat ik op ut verkeerde bord heppe skotten. Met ut kruus waj deur den loop zaang, koj oarig goed met mikken. Ik wasse dan ok bienoa de sluupskutter van oonse ploeg.

Toen wie hier met kloar waan, ging wie zegwee riene. Noe kreej weh un tweekamp. Ie han zegnee en zegjoa rieders. Noa un klein stukkie oefenen mog ie ut zelf probeern op un angelegde baane. Bennie uut washuus kon ut allerbeste. Rem konne nie en hij missen de toeter weh. Noe ginge af en toe deur het bos hen, asse der un paar wol inhaaln. Door skruk Martin S. zo van, datte um in de agteruut heffe gooit. Det muj nooit doene, want dan slötte of. Gait zag ut en wis nie meer hoette zo snel of mösse stappen asse ging stoppen. Uut noodweer isse in de top van un klein beumpie sprung. Hij hef weh vief minuuten hen en weer slingert, veur datte den beumpie löss durm te loaten.  Doarnoa mog ut opnie-j probeern, ma toen hatte ok de baane alleene.

Toen was ut tied veur de buggies. Ut duurn em dat iedereene der in zat en vastesnoert was. Met zien tienen ging wie dan eindelijk op pad. Op de eerste rotonde waan wie em heer en meester, ma der was ok gin ander vekeer. Op noar de grote stad Riessen. Wie skeurn mooj agter mekaare an. Bie Otje van Potje ging ut mis. Doar was ut drukker en zie heuln gin rekkenskap met oons. Agte van de tiene reen weer terugge agter de leider an. Martin W. en Gait ging regdeur. A gow markten zie a dat ze vekeerd waan, dus drei-jen en weer terugge noa de rotonde. De aanderen waan a vot. Wat noe… ? Gait dagt slim te wenne um in ut centrum em te waggen. Misskien zaang wie ze nog aans jaang. Wie heul veer kaanten in de gaaten, ma hept gin buggie meer e’zeene. Toe bint wie ma deur de winkelstroate e’knapt. Jammer dat der nie zovölle volk leup. Wat zoln ze dan nog an de kaante spring. A snel waan wie weer terugge bie Zwatswald. Door han zie em kontakt met de buggieleider. Die waan noe helemoal an de andere kaante van Riessen. Wie moggen noe zelf em wetten woar wie hen gingen. Wie hept Riessen em opnie-j oppeskrikt met oons geskeur. De polietsie zal nog weh em ok zuuk wenne wes na oons, ma toen waan wie allemoal a weer terugge.

 

Um un bettie bie te kom van alle skrik en skik, hep wie der ma un pilsie oppe drunken. Doarbie wun ok nog ut buuvet e’oopend. Wie mössen ok weh em weer anstarken noa alle aktievieteiten. De belle bie de bar was helemoal nie neudig. As de Zalando kjal weer bie de bar was oet de aandere zaal, dan was det veur de meeste kjals ut teken veur un nie-j pilsie. Ik kan oe weh verklappen dat den postbode regelmoatig langs isse wes. Ut was ok diepe in de oamd dat wie terugge na huus bint e’goane. Bedankt Marcel en Gait, ut was un onvergettelike oamd.

P.S. Woar ut de volnde dag nog un bettie mistig was veur mie en woar ik nog wat zwatte gaaten had, heb zelf ma un bettie ut verhaal aanepast... um het tog un bettie geleufwaardig oaver te loaten kommen.

©2014 Martin Wichink.


Reactie plaatsen

Reacties

Martin Wichink
9 jaar geleden

Ik denke dat wie det allemoal weh un bettie hept.

Annet Voskamp-Raamsman
9 jaar geleden

Mooi stukkie Martin, had alleen wat muuite met leezen kan better plat proatn

Rating: 0 sterren
0 stemmen

Klik hier om naar boven te gaan.