Aj zo is deur ut bos loopt, dan zie ie verschillende beume. Ieken, Berken, Platanen, Beuken en Dennebeumpies. Buuten ut verschillende blad wat ze hebt, zie’j ok ut verschil in de bast van de beume. De een is glad en de aander is ruw. Soms liekt ut weh op de schubben van un vis.
Aj ze nog is better bekiekt, dan zie’j ok dat ze niet op mekaare liekt. Elke boom hef zien eigen struktuur. Ut lek dan ok weh un bettie op de vingerofdrukken bie de mens. Aj nog better kiekt, dan zie’j ok de littekens bie de boom en kuj ofleaz’n watte allemoal met hef e’maakt. Hoe dikker de boom is, hoe older datte is. Elk litteken hef zien eigen verhaal.
Zo kan un dikke tak offescheurt wenne bie un storm. Of der is noodzakelek e’snuu’jt deur de boswarkers van Natuurmonumenten. Ma ut kan ok wenne dat un spechtte op zuuk is e’wes noar ongedierte. Vaake is dan de boom ziek en wutte oppevretten deur torregies. Lekker voer veur de spechtte, ma dan mutte weh un kiekgat deur de baste maken met ziene sterke snavel.
Soms wut un takke ok zo zwoar, datte de boom splitst en twee kaanten uut loat gruujen.
Mangs as un zo boom ziek is, gruu’jt der ok wel is van die rare paddestuule der bie an.
Ie mut der weh kiek op hebben, aans ziej alleene ma de bast. Doar hei’j gelukkig weh spesieaal luu veur, die hier veur e’leert hebt en ziet of de boom ziek is.
Ma as un boom e’raakt is deur onweer, valt de bast er snel of. Ondanks datte dan naakt tussen de aandere beume stiet, bleffe nog heel lange oaverend stoane. Det nuum ik nog is karakter hem.
Berkebeume hebt meer van die vellen an de stam. Slingers nuumt miene kleinwichter det ok weh is. Mooi is den witte bast met de donkere stukken dertussen. Het is un zeebraboom opa, zeg mien kleinkind dan. An de ene kaante heffe nog geliek ok met zie swat/witte strepen. Mooje uutpraken bint det. Wichterfantasie kan heel verre goane. Soms snap ie der gin bast van.
Moch ie tog nog is in ut bos kommen, kiek dan ma is goed um oe hen. Dan ziej de verschillen zelf ok vaste weh. Succes.
Reactie plaatsen
Reacties