Haarle15.jouwweb.nl

Bessems.

Laats was ik achter oons huus an ut végn met de bessem oaver de stroate, toen de stelle brak an de onderkaante. Had disse bessem ok al joaren en de heure waan ok al oarig offesletten. Mut tog nog wat planties haaln bie de Welkoop, dus haal ik doar ok meteene ma un nie’je bessem.

Kom ik doar in de winkel en doar löpp een jonge vent.

“Woar kan ik de bessems vinden”, vroag ik um.

“Wat voor soort zuuk ie dan? Een van oe of végger of un na oe toe végger.”

Keek um raar an umdat ik dach datte un grappie maakte, ma hij was bloedserieus.

“Wat is dan ut verschil”, vreug ik um dan ok. Ken alleen harde en zachte bessems, ma doar bleek nog weh verschil in te zitten. Ie mut kieken noa de gaten in de bessem hoe die a veur e’boort bint.

Isse rechtop veur e’boort, dan is det un zachte bessem en dan hoef ie gin kracht te zetten, dus det is na oe toe végbessem.

Muj grote stukken véggen, dan vég ie van oe of. Vaake bint det van die bessems met harde heure.

Aj wilt kuj ok nog kiezen uut harde en zachte heure van takken, piepenstreutjes, kokos of nijlon. Ie zegt ut ma, keuze genoch.

Noe kuj ok nog kiezen uut un dunne en dikke bessemstelle. Veur de van oe of bessem, zol ik oe de dikke stelle an roane, want dan gebruuk ie meer kracht. Bie de na oe toe bessem zol ik oe de dunne stelle an roane, want juust dan wul ie niet tevölle stof doen opwei’jen.

Met disse duudeleke wiesheid möss ik ut doene. Miene keuze was dan ok snel e’maakt. Ik mut dus twee bessems hem.

Noe mut ik weh zegn dat den jong goed zien beste deut, want hij maakte de bessems met de juuste stelle geliek kloar veur gebruuk deur ze direct vast te spiekeren. As goeje verkoper weese mie ok nog em op de stoffer en blik in dezelfde stijl en kleur.

Die hek dan ok ma der bie e’num.

Zo dan bin ik noe veur de kommende tied weer helemoal kloar. Zo ziej ma weer, nie’je bessems véggen schoone.

 ©2020 Piet Plezier.

Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier um noa boam te goane.