Wat was der toch an de haand in Hoarle. Oaveral zag ik de vlagge uut hangn en toch was der niks te ziene op ut karmisterrein begin juni.
Bie de sporthal was der ok a niks.
Gin priesterfeest was der annekondigd in de karke. Zol Hoarle ut dan tog trechte hem e’kreegn, dat ze eindeluk un veilige oaverstek bie de N viemdattig as toezegging op papier han? Ok nie? Vertel mie det grote nie’js ma is.
Ik wun ut uuteindelijk gewaa in de kraante en op sosie’jaal media. Hoarle hef un onlajn edietsie van ut karmisgebeurn hoaln op internet.
Ut Hoales feest zonder karmse en tente, ma tog ut gevuul dat wie allemoal bie mekaare kon’n wenne in disse corona tied.
Wat ok fijn was, dat de antivirus op oonse compjoeters hun wark bleem doene en oons niet verder hebt besmet. Ut valt ok nie met um anderhalve meter van oen scherm te bliem, want dan kuj ut hoaste nie leazen. Det is nie zo handig aj ok nog met wilt doene met de ‘bie huus kwis’. Of doej met de grote bingo met? Neegn rondes wut der e’speld en ie mut de juuste cijfers op skriem. Alleene veur de mooje prieze woj a met doene.
De wichters mössen ma ziene of ze de kluis konden kraaken. Veur de aanwiezingen mössen ze weh de stroate op. Tog em un frisse neuze haaln.
Aj dan tog woln borrelen kon ie op feesboek trechte en kon ie daansen veur oene eigen caameraa op de muziek van dietjee blonde Geert.
Oaver de tied hoem ze zig gin zorge te maaken, want der was hierveur tog gin vergunning neudig. Ut ging dan ok deur tut in de laate uurtjes.
Al met al was ut un geslaagd feestje. De vlagge kon uut veur de luu, dit dit geniejaale plan hebt uutedach en tut in de puntjes tut uutvoer hebt e’brach.
Zo blek ma weer hoe kreejatief Hoarle kan wenne in muuleke tieden. Ma niks is eigenlek moojer, dan daj ut Hoarles feest weer in ut echie kunt vieren. Hoppeluk kunt wie det volgend joar we weer doene en is alles terugge bie ut oale.
Bedankt organiesaatsie, jullie hebt groot wark e’leavert. Pette of.
Reactie plaatsen
Reacties