Gruun Hoarle.

Ut allerbeste veur 2020 wens ik oe toe en dat wie der weer un mooj joar van mag maaken. De stroomverziening in Hoarle wut noe zelf oppewekt, tenminste det is de bedoeling. Det is ok weh hard neudig, want teegnwoordig ziej ok steeds meer lichies in de tuin, in de leste moand van ut joar. Tis weh steeds meer ledverlichting waj ziet, ma tog kost ut stroom.

Noe kuj det nog un bettie gruunder maaken deur alle kasboomen te verzamelen en te versnipperen, dan kuj ut verbraan en doar weer enersjie met opwekken. Of ie mut un veltie hem, woar ie de kasboom weer terugge kunt potten. Ma det hef nie iedereene.

Noe is Hoarle weh vaaker gruuner bezig. Eens per joar komt wichter in groepsverbaand, rotzooi in de barm schoone maaken. Mangs denk ik op nie’jjoarsdag weh is, woar bint ze noe. De stroaten ligt dan bezei’jd met ofgestökken vuurwark.

Veur zeumzeumtig miljoen is der in Nederland offestökken, woarvan un deel ok in Hoarle op de stroate lig.

Dan vroag ik mie wel is of, of Staatsbosbeheer noe nie te völle boomen heffe kapt veur wat extra heide. De luch mut ok hier weer e’zuuverd e’wun. As wie dan net as bie Shell veur elke vuurpijl of rottie un boom konden planten, dan krieg wie vanzelf weh weer meer bos. Det mag van mie ok weh un kasboom met kloete wenne, zodaj die volgend joar weer kunt gebruuken. Dan bint wie helemoal gruun bezig tog?

Binne weh benie’jd wat wie noe in Hoarle kriegt. Wut ut un windmölle, zodat wie ok weer un Mölle in Hoarle hebt of wut het un zunnepark. Beide hef weh wat.

Wie mut tog in ut joar 2050 enersjie neutraal wenne en det is a oaver dattig joar.

Wie mut dan weh meer stekkerplaatsen hem veur alle elektriesche auto’s

of ried wie straks allemoal droadloos op wiefie. Det zol weh mooj wenne. Dan kuj op Google gelieke ziene woar ie ried of woar ie oene auto parkeert hebt.

Misschien left wie dan weh völle meer buuten. Umdat wie de koelkaste en diepvries buuten hebt stoane, um zo de opwarming teegn te goane. Wie bint der nog nie, det is mie noe weh duudelek.

Oe ok? Mooj, dan kunt wie in Coöperaatsie verbaand weer völle bereiken saam in Hoarle.

©2020 Piet Plezier.

Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier um noa boam te goane.

Maak jouw eigen website met JouwWeb