Heel em dach ik dat Wendy van Dijk in Hoarle was e’wes met zien HART in actie, want oaveral in ut dorp zie ik HARTJES stoane of hangen.
Alleen bin ik ut oranje bussie van haar nie teegn e’kom.
Noe heurde ik em laater dat plaatseluk belang de Hoarlese zorg un HART onder de riem wol stekken, want die hebt ut ma druk in disse tied.
Ok Hoarle is HARD e’raakt, ma wie bint en blieft un nuchter volk. Mantelzorgers die blieft ummekieken noa hun noaste. Ok de oldere luu kriegt op zien tied raambezuuk, un bluumpie of un kaarte in de briembusse.
Det is ok HARTverwarmend um te ziene.
Zelfs bie de pas wut aandacht e’vroagn um Hoarle Corona vrie te hoaln. Dus nie met tevölle volk ut bos in. Volgens mie giet det oarig goed, ok a kump ut mooje weer noe der weh weer an. Dan wult de luu noa buuten hen.
Begriepeluk, ma ok angstig. Noe heb wie hier nog weh de ruumte en un hoop kui’jerpaadjes, zo kunt wie dus mooj alle kaanten uut.
Un hoop luu leert noe in disse tied de natuur opnieuw te ontdekken. Un veurbeeld is de vogelbescherming, doar bint dit joar a heel völle kaarten e’download oaver vogels in oene eigen tuin. Der wut noe ok meer nestkassies e’bouwt en e’plaast. Nie alleene um meer vogels in eigen tuin te kriegen, ma ok de prossessierupse te bestrijden, want die bint ok a weer onderweg.
Zo blieft wie bezig in oons mooje dorp Hoarle. HARTstikke mooj zolange wie mekaare ma de ruumte geeft.
Ut is noe em HARD warken, ma HARTstikke goed dat wie det met en veur mekaare kunt en mag doene. HARTverwarmend hoe wie det weer veur mekaare kriegt met zien allen. Det dut oons Hoarles HART alleen ma sneller van kloppen.
Deurumme wol ik met dit verhaaltie iedereene em un HART onder de riem stekken.
Reactie plaatsen
Reacties