Haarle15.jouwweb.nl

Kleurriek bladwark

Gruun, gel, rood, peers, broen en bie zwat’of, zovölle kleuren kom ie teegn an bladwark. Heel normaal wat in dit tiedstip van ut joar van de beume of kump. Asof de beume oons nog un bosskop met wil geem.

Veur julle wil ik nog een keer mooj wenne, veurdat ik al ut blad loat vallen. Met regen en un boele wind, kump ut allemaol terechtte op de grond.

Wat doet wie dan allemoal? Juust… blad opruumen. Op de weg en op oonse stoepjes, doar kan ik ut begriepen. In de tuin muj ut eigenlek loaten liggen. Ut is goeje mest en heel wat dierlek volk is der blie’j met.

Un stekkelvarken kroept graag in un vössem met bladeren. Doarin kanne dan mooj zien wintersloap hoaln. Reegnwormen kunt der zich te goed an doene en zo ok nog mooj veur de ofwatering zorgen. Wes ma eerlek, as der völle water valt in ut noajoar, dan bint wie weh blie’j, dat ut rengwater snel de grond in trekt en dat ut nie blef stoane. Dan zol der un hoop kapot kunnen vriezen in de winter. 

Noast dat ut bladwark goeie mest is veur oonse tuin, leaverd det soms ok nog nie’j leaven op. Det ziej vanzelf weh, as ze as paddestoelen uut de grond schiet. Ma wuss ie ok dat ut bladwark un goeje extra bescherming is teegn de vorst.

Deur al det bladwark wat der op de grond ligt, doet wie ok nog völle an de ofkomst doarvan te roajen. Is ut un bark, Hollandse of Amerikaanse ieken, misskien is ut weh un heel ander soort boom of stroek uut de tuin van de buren. Want nie iedereene hef dezelfde stroeken as de buren gelukkig.

Det maakt ut ok zo vroolek in de stroate. Ma deurdat wie met zien allen op de grond blieft kieken, ziet wie nie de kaale beume. Det valt oons pas op, as der vorst an de grond is e’wes en zo ut rottingsproces versnelt. Dan bint de kleuren snel weg en kiek wie dan pas weer umhoog.

De beume bint a kloar veur de winterbehandeling, noe wulle nog.

©2019 Piet Plezier.


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier um noar boam te goane.

Maak een Gratis Website met JouwWeb