Haarle15.jouwweb.nl

Peerdebloem

Heb ie ok weer zo genooten van de eerste Pinksterbloemen, noast de weilaanden vol peerdebloemen in de ofgelopen moand. Ikke weh.

Peerdebloem, wat een gekke naame eigenlek veur un bluujende plante. Aj tenminste een weilaand vol ziet, zonder dat der ok ma één peerd in rond lóp.

Toen bin ik ma is em goan zuuken op internet. Dan kuj doar vaste weh wat oaver vinden. En joa heur, zie heb an de bloeme mar un naame geem, terwijl ze eigenlek nie eens wussen of ut misskien un onkruud was. Det maakt de boeren niks uut. Ut zörgt in ieder geval veur un goeie ontluchting en ofwatering van de grond van de weilaanden. Mocht ut un tiedje dreuge wenne, dan kröp de reengworm bie un eerste buuje deur de holle stengel hen, veural as de grond goed hard e’wun is. Skelt weh un hoop graafwark.

Wie ziet ze vaake as eene gelle kleur, ma wus ie dat der weh 250 verschillende miekro soorten bint. Ma aj die ok nie met ut bloote oog kunt ziene, nem ik oe det ok nie kwoalek.

Vremde naam kriegt ze weh in de verskillende streken in oons laand. Van hondstong tut leeuwetaand of van pissebloem tut kettingspol, terwijl de blaaderen ok nog is bekend stoat as etbare molssloa tut de bluuj. Konienen blaaderen wut ze ok weh is e’nuumd.

Bes weh un bettie gek, aj tenminste noa goat dat koejen, schoapen en geiten ut vret as genezing bie un darmstoornis. Dan zoj toch un andere naame bie disse bloem verwachen.

Noe is disse plant weh bekend in de kruuden industrie as geneesmiddel.

Zoln ze ut dan ziene as een peerdemiddel teeng verskillende kwoalen. Dan kank de weh un bettie vree met de naame hem.

Woar ik mie weh oaver verbaast heb, is dat ze in Ruslaand probeert hebt, um hier rubber uut te haaln. Honderdvieftig kilo per hektaare kon ze doar uut haaln.

Mooie bieverdienste veur de boeren met laand. Dan zol Hieveeja uut Roalte zo noa de bloemenweide in Hoarle kunnen kommen veur de rubberen leerzen. Ma det zie ik zo nog nie gebeuren.

Aans kuj der ok nog aaltied un sieroop van maaken. Goegkel zelf ma is op internet. Misskien zit der veur oe ok weh un peerdemiddel tussen. Disse bloem hef ziene sporen a weh verdiend, as ut nie weit.

©2019 Piet Plezier.  


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier um noar boam te goane.

Maak een Gratis Website met JouwWeb