Soms vroag ie oe weh is of woar iets noe veur dient. Nem noe bie de oale ingang bie de pas. Doar heb ze noe een joekel van een drempel neer e’leg. Eerluk is eerluk, met de fietse kuj der weh langs en gin auto kan doar in.
Zol ut dan un uutkiekpost wenne veur de rolstoelerers of luu met een roolaator? Denk ut nie, want dan zol ut nie zo steil en rond wenne, a kuj der weh prima van oe ofkieken.
Un deeting plekke zol ok nog kunnen, ma doar stoa’j dan weh oarig in de kiekert.
Tis ok gin spelding veur de wichters, want die hebt hun eigen stukkie bos. Het is ok gin opstapplaaase veur de heideslak, want der stiet gin bushokkie bie.
Noe der pas un nie-j bord is e’plaatst, ging der bie mie un lichie braan.
Ut is de nie-je startplaatse veur Sallands moojste. Vanuut de hoogte starten, zodaj gelieke snelheid hebt. Det heb ze natuurlek offekekken van de Lochsprinters oaver de barg. Det hebt ze vaste zeene op de lokale teeleviesie. Niks mis met heur, want iedereene hef dezelfde kaans. Alleene ried ze hier nie op un vaste baane.
Nee, wat meer zol stoorn is meskien de tekst wat doar op ut bord stiet. ‘Un kussie en dan goan’ is doarop te leazen.
Dan kreg de naame Sallands moojste weh un hele andere betekenis, as det zo zol gebeuren bie de start veur elke deelnemer. Ie vergroot zo weh de promotiekaansen, ma ok ut deelnemersveld. Gelukkig bint ze dan bie de start nog nie zo smeerig en zweeterig. Det krieg ie dan bie de eerste drie van elke kattegorie bie de kjals en vrouwluu. Die hebt dan ok un prestaatsie neer e’zet van wie ut snelste van allemoal bint in hun groep en det mut beloond wun.
De kiekers kunt doarvan genieten vanof ut terras bie de Pas.
Ma zoj dan ok verkiezingen kunnen kriegen in Hoarle zelf. Wie is ‘Sallands moojste’ van dit joar? Dit zol kunnen tijdens de karmse of met de carnaval. Zo krieg ie der zo ma weer un nie-j evenement bie in Hoarle. Of warp ik noe zelf un te hooge drempel op en is ut tog nog wat aans? Wie wet heurt of least wie det nog eens op de lokale teeleviesie of in de kraante. Ik wagge weh of.
Reactie plaatsen
Reacties