Haarle15.jouwweb.nl

Stöppels op ut laand

Aj in de winter wel is un frisse neuze wult haaln, dan kom ie der weh is langs. Van die zwatte akkers met stöppels der op.

Det bint olde maislaanden e’wes. Aj goed noa goat, bint det ok gewoon eenjoarige planten. Ut laand wut goed bemest in ut veurjoar, dan wut ummeploegd.

Noa em rust hemme kreegn kump ut zoad der in. Dan begint ut wachen. Noa un aantal wekke kump ut langzaam uut de grond. Dan mut der weh e’spuit wun, want ut onkruud mag nie van ut plantie winnen.

Soort van Russiese praktijken dus. De stengels schiet langzaam de luch in tut weh un paar meter hoog. Het blef toch aaltied weer un fasinerend gezichte, tut daj der helemoal achter zit.

Dan kump ut spannendste gedeelte. As de stengel begint met puberen. Zie kriegt dan de board in de… eh stengel, zeg ma. Doar mut uuteindeluk de maiskolven in kommen. Hoe meer boarden, hoe better.

As ze noa un half joar begint te verkleuren, dan bint ze riepe. Grote maiskneuzers bint dan van vrog tut laate in de weer um alle boeren te bedien.

Zo wut ut gehakselde mais noa de paskoele e’brach en oppe-sloane. Dan heb de koejen swinters ok oarig vers voer, net as wie ut etten uut ut diepvries haalt.

Ma noe dwaal ik un bettie of, want de stöppels blieft stoane op ut laand. De wottels hebt alle grondstoffen uut de groand e’haald en na boam transporteerd. Zo kon den stengel mooj gruujen. Noa al det wark bleffe achter op ut laand. Ie blieft doar stoane in weer en wind. Kriegt te maaken met storm, regn, en aandere winterse neerslag.

As ut dan ok nog is hard giet vriezen, dan kregge nog koale vuute ok. Langzaam rotte dan ok weg. Vegetten veur al ut wark waj heb e’doane. Int veurjoar aj dan helemoal zwak bint, dan krieg ie ok nog stront over de kop, tutdaj messcharp ummedreit wut en ut oe zwat veur de oogen wut. Dan wet ie daj de strijd verleurn hebt. Oene opvolger stiet dan a weer kloar, veurdat ie den ok ma een keer waarschuwen kon. Gin wonder dat ze dan ok zegt, de natuur is hard.

©2018 Piet Plezier.


Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier om naar boven te gaan.

Maak een Gratis Website met JouwWeb