Dat ut kan stormen in Nederland, det wet wie weh. Zie bint noe net as in ut buutenlaand ok begun om stormen un naame te geem.
Ut is van doar oaver kommen wei’jen, zak ma zeng.
Noe kuj doar luchtig oaver doene, want ut meeste weit weh weg. Ma as un storm noe koode oranje of rood kreg, dan muj oppassen.
Alles wat weg kan wei’jen, muj vaste zetten of opbargen. Nie alleene veur oezelf, ma ook veur un aander. Zo hoal ie de schade klein. Noe bint der aaltied luu, die doar veurdeel in ziet. Dan krieg ie ok is wat nie’js. A kunt doar ok haaken en ogen an zitten en dan he’k ut nie oaver un dekzeil.
Vief van die stormen heb wie noe al e’had. Wat ik nog nie wus, is dat ze a begint te tellen vanof september. Atiyah, Brendan, Ciara, Dennis en Ellen hebt wie noe e’had. Weh vaake in ut wiekend en det is ma goed ok. Dan is iedereene bienoa bie huus en dan kuj ok gelieke de rommel weer opruumen, ok a is ut nie van oezelf.
Dan is der ok minder verkeer op de weg en det schelt a weer bie ongelukken. Kapbeleid wut em an de kaante scheam en dan wut der nie op un beumpie meer of minder e’kekken. Det is soms ma goed ok. Ie zoln der ma eene op oene auto of huus kriegn.
Dan ma em iets minder gruun bezig wenne. Det kump weh weer. Met natsiejonaale beumendag kunt wie zo de schaa weer rechtzetten, as ut op den dag natuurlek niet te had weit.
As wie noe nog neegn stormen kriegt, dan is ok miene naame un feit. As storm Piet wut ik dan e’nuumd. Det past dan weh un bettie bie mie. Bin un boom van un kjal, wei’je met völle winden met en stekke miene haane graag uut de mouwen. Doarnoast bin ik ok nog un luchtig persoon. Zo zie’j ma weer dat de naamkeuze zo gek nog nie is. Wanneer ie noe an de beurte bint, det wet ik nie. Zie hebt mie ok niks e’vroagn of Piet goed was. Doe doar ok gewoon luchtig oaver en blieve met de beide beene op de grond stoane. Noe ma hoppen dat ut allemoal un bettie mag oaverwei’jen. Hoal oezelf goed vaste.
Reactie plaatsen
Reacties