Ie komt ze oaveral weh eens teegn. Of ie noe in un bos loopt of oaver een diek of duinen bie zee. Mangs heb ie dan van die kleine paatjes, die zo van de hoofdweg weg loopt. Vaake un bettie kronkelend en de bochte verdwijnt dan achter un boom of stroekwark.
Disse nuum ik noe verdwaalpaatjes. Aj doar dan in loopt, dan wet ie nie wat der noe achter de bochte giet gebeuren. Ie ondekt dan un nie’je wereld as ut ware met aandere weegn.
Wat doarnoa dan weer kump, det is dan ofwachen. Veur ut zelfde geval kan un pad ok ineens ophoaln.
Muuleker wut ut as ie op un kruusing komt, woar ie meerdere richtingen uut kunt. Dan muj kiezen. Goa ik links of goa ik noe rechts, ma rechtdeur kan ok nog.
Eigenlek maakt ut nie uut veur wat van kaante ie kiest, aj de weg ma terugge weet. Aans is ut lastig zuuken, aj bijveurbeeld met oene fietse of auto bint e’kom.
Ut moojste is weh, daj dan vaake mooje stukkies ongerepte natuur ziet. Asof ie de eerste bint, die dit paadtje heffe vun. As un eerste astroonout in het stoefzaand, zo mut det dan ongeveer vuulen.
Ik zal oe gewoon zeggen, moch ie oojt eens zo’n paatje vinden, loop der dan gewoon is in. Is kieken of ie dingen kunt vinden, die ie nog noojt eerder e’zeene hebt.
Of dat ie biezondere bloezems kunt ontdekken van de verschillende stroeken en beume, woar ie normaal zo ma an veurbie zoln goane. Leg ut vaste met oene mobiel en maak zo un mooje seerrie oaver disse biezondere verdwaalpaatjes.
Ie mut ut veur de eerste keer gewoon is doene en uut probeeren. Aj det een moale doane hebt, dan is er gin terugkeer moogelek. Ut zuut as ut waare gewoon an. Ik kan oe niet aans zeggen en hoppen, daj der un hoop plezier an beleft. Dan ziet wie vanzelf weh de fotoos op feesboek of aans op ut wiedewereldweb of zo.
Ie mut ma zo rekken, ie kunt ma tut de helfte ut bos ma inlopen, want dan loop ie der ok a weer uut. Völle wille.
Reactie plaatsen
Reacties