Haarle15.jouwweb.nl

Wat vin ie doar noe van.

Steeds meer in oonse saamenleeving wut der steeds meer van oons e’vroang. Ut lek weh dat wie oaveral wat van mut vinden. Un poll hier en un poll doar, oaveral is der weh iets woar oonse mening wut e’vroagt.

Loop ie gezellig te winkelen, dan kom ie soms un student teegn, die un opdrach van skoole hef. Of aans kuj zo ma eene van de plaatseleijke umroep teegn kommen, die tijdens de verkiezing alles wul wetten van de kiezer uut de gemeente.

Ok in oonse meelboks wut oene meening e’vroagt, aj online un keer iets besteld hebt. Vun ie ut wat of niet. Geef oene meening en maak kans op un waardebon van zovölle euro.

Heb nog nooit eene heurt, die det e’wun hef. Ma doarnoast is ut ok nog is zo, as ut mie nie had annestoane, dan ha’k ut weh terugge stuurt.

Ie kunt van völle tiedschriften of kraanten tiedelijk lid wun, ma de noaslep doarvan vin ie terugge in oene meelbox of telefoontjes doarnoa. Zie adverteerd der weh met dat ut vanzelf stopt, ma aj det zelf nie stop zet, dan giet ut weh un poosie deur.

Noe wet ik ok weh, daj zelf un hoop invult via internet. Regels met un sterregie muj dan ok aaltied invullen, aans kuj nie wieder. Loat det noe net de kruusieaale dingen wenne, woar ze oe later op terugge kunt pakken. Nergens woar ok ma stied, daj det noe net nie wilt. Dan zol het a un stuk gemakkelukker wenne veur oons. Gin gezeur of gedram achterof.

Noe zult disse thuuswarkers weh goedkoper wenne as personeel in un winkel, die noe dichte zit, ma wie kriegt ut weh allemoal in oonse skoene sköm.

Dan verget ie nog de bedriem, die disse gegevens ok nog eens deur verkoopt en doar nog is better an wut. Det nuum ik gin mond op mond reklaame meer.

Noe kan ik hier nog weh un website bie skriem, een of aander onbekend nummer geem woar ie doaroave terechtte kunt wat ie doar noe van vnind, ma dan denk ik toch bie miezelf, doar wil ik oe nie met opzaadeln. Dan zol ik zelf gin hoar better wenne.

©2020 Piet Plezier

Reactie plaatsen

Reacties

Er zijn geen reacties geplaatst.
Rating: 0 sterren
0 stemmen

Klik hier um noa boam te goane.

Maak een Gratis Website met JouwWeb