Tis heerlek hartje winter. Zit net met un bak koffie te genieten achter glas in de zunne. Deur ut raam kiek ik na buuten veur ut weer. Tis dreuge, zunnig en weinig wind. Zie de ies op de roeten van de auto, ma ok ut wit op de stoeken en beume.
Det gef altied wel weer un biezonder gezicht in de natuur. Zo leer ie de skoonheid van de natuur te bekieken in ut wintens laandschap.
Noa mien tweede bakkie heb ik mien besluut e’noam. Doe mien skoene en winterjasse an en zet un mutse op miene kop. As leste stop ie mien mobieltie in de jaszak.
Ak de veurdeure uut loope en de deure acht mie dichtte trek, zie ik gelieke ut veurdeel van ut woon an un klinkerstroate. De weg woar niet e’streujt is en op de stoep, zie ik ut un bettie glinsteren. Uutkieken dus.
Met hennige stappen loop ik richting ut bos. Doar aangekommen blef ut uutkiekek bie de gladde boomstronken en wottels.
Ut prachtige uutzicht vergoed alles. Kale geraamtes van de beume bint prachtig versiert met witte sneepoe’jer en wat ies op de takken.
Toch ligt der gin ies op ut water in de sloot. Zovölle stroming stiet doar ok nie in. Kieke em op miene mobiel en zie dat ut een groad boam nul is. Dan vröss ut ok nie. Messkien dat der af en toe toch weh is wat stroming is. Wie zal ut zeng.
Toch maak ik der em un foto van. Disse natuurverskijnselen maak ie natuurlek nie elke winter met. Dan kan’k in ieder geval zeng, ik heb de foto’s nog van disse winter. Ut blef natuurlijk nie bie disse ene foto, det kuj vast weh begriepen.
Maake graag foto’s van de natuur. Ie mut de skoonheid op ziene hoogtepunt vast kunn leng. Toch zuj ziene aj dit a wat langerder doet, dat gin foto ut zelfde is, terwijl ie vaake we de zelfde rundties loopt. Of ut noe winter, lente, zommer of harfst is.
Wie kriegt ut gratis annebö’jen. Geniet der zelf ok van en maak völle foto’s veur eventuele slechweermomenten. Dan kuj der twee keer noar kieken en genieten.
Reactie plaatsen
Reacties