… of eigenluk vroagen, is ut jullie al oppevallen dat Overiessel in veer stukken wut verdeeld? Dat Twente en Salland scheiden wut deur de heuvelrug, det wet wie allemoal weh. Ma oaverdwars krieg wie ok nog is de A viemdattig. Un stukkie snelweg van uut Enschede tut noe a veurbie Almelo lig der al. Dat ze doar de A ééne der ok bie op hebt anneslötten, is mooj mettenöm. Ma de A viemdattig kröp steeds wie-jer. Bie Heino han ze det a snel begreppen. Hups, un rondweg um ut dorp. Al die vrachtwaagns deur de dorpsstroatte, det giet ok nie.
In Nijverdal heb ze noe un tunnel e’graam, dwars deur de plaase hen. Zelfs ut spoor heb ze mun verleng. Zie bint doar zo blie-j met, datte noe bienoa elke veertien daagn de tunnel dichtte doet veur onderhoald.
Ma in Roalte bint ze der nog niet uut wat ze wilt. Zie wilt de huidige weg dieper de grond in hem of deur ut industriegebied hen. Vind ut beide ma niks. Ik zol zelf veur un noordelukke varieant goane. Zie hebt noe de kaans um ut in een keer goed te doene. Ik zal der oe em un tekening bie doene, dan kuj ut zelf ziene. Natuurluk komt der ok wat wegen te vervallen en ut spoor wut aans.
Mariënheem… loat ik links ling. Bie ut spoor kump dan un rotonde te ling, woor ie rechtuut kunt en ten noorden van ut dorp langs goat. Dit trek wie deur tut boaven Roalte Noord. Doar zol ik dan un gigantiese kloaverblad maken. Woar ie rechtuut kunt noar de rondweg van Heino. Linksof na Demter en rechsof na Hoogevenne toe. Dan hebt de Roaltese dorpen ok niks meer te zaaneken.
Roalte kan zich dan saamvoegen met Noord en Mariënheem en de boele zo vol bouwen. De grote wége lopen der dan al mooj langs. Dit is meteene goed veur Luttenbarg en Lemelerveld, ma ok veur ut vrachtverkeer in Roalte. Die hoeft dan nie meer deur ut dorp hen.
Bie de rotonde veur Mariënheem kuj dan ok meteene linksof noar de N332 toe. Ok hier hek un tekening van e’maakt.
Zo wut ut centrum van Hoarle ok ontlast van ut vrachtverkeer. Elk dorp kreg natuurluk weh zien eigen weg veur hun eigen industriegebied. Want det vind ik dan weh weer un veurdeel. Alle dorpen kriegt zo dan weh eigen inkommen, umdat ze zo centraal ligt an disse belangrieke wege. Dan blieft de dorpen leavens vatbaar.
Ik goa der dan ok van uut, dat wie det in Oaveriessel dit zelf allemoal weh kunt. De Sallandse wegenbouw en de Reko kunt de wége weh an leggen. Ut asfalt waj nie meer neudig hebt, kuj tog hergebruuken. Zo bint wie ok nog is gruun bezig.
Bouwbedriem kunt ieders wat volk leveren veur ut beton storten en bekistingen maken en ok hun normale wark bliem doene. Elektro- en instalatiebedriem zörgt voor ut lich, stroom en ofvoer van ut rengwater. Un bettie gruun langs de weg is ok weh wat veur te zeggen veur de tuinders en boeren. As wie allemoal saam warkt veur un vaste pries, dan kunt wie ze doar in Den Haag mooj un poepie loaten roeken. Wie doet ut zelf weh met eigen volk en samen verkavel wie de ruumte die der is. Doar bint wie gin gladjanus uut Den Haag veur neudig. Moch’ter tog wat oaver bliem, verdeel we det ok nog weh.
Noe is ut tied veur de veraanderingen veur de toekomst. Noaberschap, doar bint wie stark in.
Reactie plaatsen
Reacties